Musika proposamenen tartean Fugazi taldea ekarri digu Axier Aizpuruak, danbor soinuak alde batera utzita. 80-90 hamarkadako underground giroan murgildu gara berarekin. Musika aldetik eta etikoki Fugazi taldeak izandako konpromisoa eta jarrera nabarmendu dizkigu Aizpuruak. Bertako musika taldeengan eta zigiluengan izandako eragina ere nabarmendu digu. "Suggestion", "Song #1", "Turkish" eta "Waiting room" kantuak entzun ditugu.

Donostiako hiriburuaz gainera beste hainbat lekutan ospatzen da San Sebastian eguna. Azpeitia eta Tafallara ere jo dugu. Eneko Etxeberria Azpeitiko alkatearekin eta Haizea Lizarbe Tafallako Jai batzordeko zinegotziarekin hitz egin dugu. Donostiari dagokionean berriz, atzerrian egonda ere urteroko hitzordua galtzen ez duen Mikel Ormazabalek trasmititu digu San Sebastian egunaren izpiritua.

Hala esan digu direla Maskaradak zuberotarrentzat Battitta Berrogain aurtengo errejentak, odolean daramatzatela. Astebeteko atzerapenarekin atzo abiatu ziren Zuberoko iñauteriak Sohütan. Apirilaren 17 arte igandez igande ariko dira Zuberoan barna. Tradizioari lotuta baina berritasunekin dator aurtengoa ere; artzainak xorrotxen ordez eta buhame guztiak emazteak dira.

[TERTULIA] Oihana Bartrak egindako Nire amaren hiria dokumentala oinarri hartuta Bilboko euskal kulturgintzari begira jarri gara Anartz Bilbao eta Ibai Etxezarragarekin. Hain arrotza al da euskaldun izatea Bilbon? Zein bilakaera izan du euskal kulturgintzak bertan? Zein aje ditu eta zein aukera ematen ditu?

Yellow Submarine info7 irratiko musika saioko gidari Ines Garcia oso David Bowie zalea da. Hain zuzen, saio berezia prestatu dute berak eta Maria Ugartetxeak datorren ostegunerako. Inesek kontatu digu bere kabuz deskubritu zuela Bowie 17 urterekin Zarauzko liburutegian eta txundituta geratu zela bai musikalki eta baita estetika aldetik ere. "Starman" kantua hautatu du.

Igor Elortzak David Bowie zuzenean ikusteko aukera izan zuen duela hogei urte Katalunian. Musikariaren elegantzia eta estetikaren zainketa nabarmendu dizkigu berak. Hertzainak bezalako euskal taldeen bitartez ezagutu zituela Bowie, Lou Reed eta beste hainbat aipatu digu. "Ziggy stardust" kantua aukeratu du Elortzak.

David Bowieren Ziggy Stardust lanarekin Capsula taldeak eskainitako kontzertura batera joan ziren Fermin Etxegoien eta Anartz Bilbao. Batak zein besteak asko dute Bowieri buruz kontatzeko. Etxegoienek hunkidura handiz jaso du haren heriotza. Anartzek nola ezagutu zuen kontatu digu. "Aladdine sane" eta "Modern love" kantuak hautatu dizkigute.

Jendez inguratuta eman dio lehen tragoa aurtengo sagardo berriari Aritz Aranburu surflariak Hernaniko Zelaia sagardotegian. Aurrez, aurtengo sagardoaren ezaugarriak eman dituzte Astigarragako Sagardoetxean. Ilunagoa, gradu erdi bat gehiagokoa, txinpartatsua eta aroma garbikoa da, baina batez ere "ona, beti bezala" hala aurreratu digu Joxe Angel Goñi Sagardoaren Lurraldeko bozeramaleak.