Duela pare bat aste egunkari batek kaleratu zuen artikulua hartu du hizpide Azkue Fundazioko Amaia Ocerinek.

Mitoez eta maitasun faltaz hitz egin du Leire Narbaizak gaurkoan.

Euskaraz bizitzeko berak egindako hautu pertsonalaren esperientzia azaldu du Banaiz Bagara elkarteko Petra Elserrek. Nabarmendu du jatorri atzerritarrekoa izanik, kasu berezia izan daitekeela berea, euskararekin elkarbizi diren hizkuntzekin ez duelako harreman berezirik. Hala ere, egunerokoan euskaraz hitz egiteko ahaleginean, egoera xelebre bat baino gehiago egokitzen zaizkio. Nabarmendu du halako hautu bat egiteko barne segurtasun handia behar dela, euskaraz bizitzeko topa ditzakegun oztopoei lasaitasunez aurre egin behar zaiela, inor etsai gisa ikusi gabe.

Garabideren izenean, Xan Aireren eta Karine Etxeberriren iritzia izan dugu entzungai.

Joan den larunbatean, Iruñeko haur eskoletan D eredua ezartzeko epaitegiek jarri dituzten oztopoen aurkako mobilizazio jendetsuan parte hartu zuen Nestor Estebanek.

Bai Euskarari Ziurtagiriko Rober Gutierrezek irudipena du 'elkarlana' asko aipatzeak ez ote duen hitza fetitxe bihurtzeko arriskua eragiten. Haren ustez, aurrera egitekotan, lehiakorra ez den elkarlana sustatu beharko litzateke, kontsentsua helburu izanda. UEMA Udalerri Euskaldunen Mankomunitatearen 25. urtemugari begira, elkarlan eredugarriaren adibide izan dela UEMA nabarmendu du Gutierrezek. Baina EAJko Euskadi Buru Batzarreko arduradunak elkarlanerako foro aproposena Eudel dela esateak atentzioa eman dio. Mende laurdeneko ibilbidea duen eragileari, beraz, aitorpenik ez ziola egin uste du Gutierrezek. Beraz, elkar aitortu eta elkarlanerako borondatean sakontzea tokatzen dela iruditzen zaio.

Aspaldion, euskalgintzaren bueltako kritika dezente izaten direla eta, aspertu samar dagoela aitortu du Euskaltzaleen Topaguneko Iker Martinez de Lagosek. Euskaltzaleek ajeak badituzten arren, ia euren burua zigortzera adinako autokritika egitea ez dela sanoa nabarmendu du. Gainera, kritikak hirugarren pertsonan eta distantziatik egiteak ez duela mesede egiten uste du Martinez de Lagosek.

Burgira bidaia egiteko baliatu duten Panpoxa furgonetatik eman dute euren iritzia Pirritx eta Porrotx katxiporretarrek. Burgiko 'Ireki borta uskarari' festara joan dira, sudur gorriek parte hartu izan baitute Nafarroako mendialdea euskalduntzeko lan eskergan. Hala ere, Iruñeko haur eskoletan D eredua ezartzeko egon diren oztopoek kezka eragin diete pailazoei, baita ETBren emisioa galarazi izanak ere. Hizkuntza, kultura, eta ohitura txikiz osatutako puzzle koloretsu gisa irudikatzen dute mundua, hargatik, txikiek ere oztopoak gaindituz aurrera egingo duten konbentzimendu osoa dute.