Porrotx batu da Katxiporretarren taldetik Egin Kontura gaurkoan. Bi aste luze pasatu ditu sorbaldako minez eta sukarrez Donostiako ospitalean, eta bertako langile jatorren arreta eskertu du. Gelakide izan dituen beste bostekin egindako harremana ere eskertu du, baita bere faltan han eta hemen lanean aritu diren Katxiporretarretako beste kideen ahalegina ere. Kide horiek euskal eskola publikoaren Hendaiako festan izan dira, besteak beste, eta aurki joango dira Araba Euskarazera ere. Izan ere, hizkuntza txikiko herri txikia izan arren, euskaldunok munduari geure kolorea eman diezaiokegula uste du Porrotxek.

Maiatzaren 7an Euskaltzaleen Topaguneak antolatuta egin zen Zubideiak dinamikan ateratako ondorioez hitz egin du Topaguneko kide Jasone Mendizabalek. Bertaratu zirenen artean euskara aniztasunaz eta bizikidetzaz hitz egiteko grina zegoela sumatu zuten. 80 lagunek talde txikietan parte hartu zuten eta 23 eztabaidagairen bueltan aritu ziren.

Partaideen herenak ez zekien euskaraz, baina aldi bereko itzulpenerako entzungailuen nahiz belarrira xuxurlatutako itzulpenen bidez bermatu zuten denen ulermena. Besteak beste, aurreiritziez, elkarbizitzaz zein ekintza praktikoez hausnartu zuten.

Jende askok esan izan omen dio Alex Artzelusi euskarazko testu zaharrak irakurtzeak ez duela balio, ia denak erlijio katolikoari buruzkoak direlako. Artzelus ados dago horretan, baina ez du uste euskaraz idatzi den guztia erlijioaren ingurukoa denik. XVI. mendean, adibidez, Bernat Etxepareren poemetan sexuaren inguruko xehetasunak topa daitezkeela nabarmendu du Artzelusek, Etxepare abadea izan arren. Badira, ordea, garai hartako poema gehiago maitasun istorio konplikatuei buruzkoak ere. Baita neska gazteen ikuspuntutik idatzitakoak ere, emakumeak erabat bazterturik zeudela kontuan izanda.

Euskararen bueltan esaten direnak kontuan izanda, gehien borrokatu beharreko aurreiritziak zein izango liratekeen galdetu digu Kike Amonarrizek.

Nafarroako Gobernuak orain arteetan iluntasunean zokoratu nahi izan dituen euskaldunei erreparatu die Euskararen Gizarte Erakundeen Kontseiluko Paul Bilbaok.

Aramaion bizi da Manex Agirre eta bertako herritarrak harro daude Aramaio UEMA Udalerri Euskaldunen Mankomunitateko herria delako.

Espezialitatea egiten ari diren mediku egoiliarrez hitz egin du Aitor Montes familia medikuak gaurkoan.

Euren atarian jaso dituzten azken azken materialen berri eman du Eima katalogoako Fernando Berrizbeitiak, egunotan ari baitira euren katalogora iristen.