Oiartzunen gertatutako pasadizo baten berri ekarri du Martin Kittok. 11-12 urte inguruko haurrez beteta omen zegoen udaletxe ingurua, haietako bi neska inguratu zitzaizkion galdera batzuk erantzungo ote zizkien jakiteko. Arrasateko ikastetxe batekoak ziren haur haiek eta euskara irakasleak prestatutako galderen erantzunak lortu nahian zebiltzan. Beste talde bat etorri zitzaion gero baina haien galderak gaztelaniazkoak ziren. Martin Kittoren ustez, amildegi handia dago irakaslearen asmoen eta ikasleen belaunaldiaren artean, baina hasieran etorri zitzaizkion neskatoen adibideak itxaropena izateko ere balio du.

Behe Bidasoako Antxeta irratiak Donostian eta inguruetan emititzeko lizentzia eskuratu berri du, eta hori baloratzeko agerraldia egin dute goizean Antxeta irratiko eta Arrosa sareko ordezkariek. Aitziber Zapirain eta Jon Aranbururekin hitz egin dugu horretaz gaurko irratien tartean.

Eusko Jaurlaritzak kudeatzen duen Elebideren zereginari erreparatu dio Eneritz Albizuk. Izatez, Araban, Bizkaian eta Gipuzkoan gaztelaniaren eta euskararen erabilera aukerak berdinak direla bermatu beharko lukeen arren, erakunde hori eskuak garbitzeko erabiltzen dutela uste du Albizuk. Martxoaren 18an sartu zuen berak kexa bat Elebiden, Azpeitiko Lanbideko bulegoan gertatutako pasadizo bat medio, eta apirilaren 27an jaso zuen erantzuna. Baina erantzun horrek ez zituen Albizuren kezkak asetu, hargatik, berriz ere kexatu da eta erantzun berriaren zain dago oraindik.

Beleixe Irratiko esatari Maider Beteluren eskutik Sakana aldeko kontuen berri izan dugu. Ondoren, Aitor Kaltzakorta eta Oier Imazekin tertulian murgildu gara, eta Arnaldo Otegiren Kataluniako bisitaren harira, pozesu independentistaz eta ekainaren 5ean Euskal Herriko hainbat eremutan egingo diren galdeketez hausnartu dugu.

Paleolitoan gizakiek Eurasiatik Afrikara migratu zutela erakusten duen ebidentzia bat aurkitu dute EHUko Genetika, Antropologia Fisikoa eta Animalia Fisiologia Saileko ikertzaileek. Errumanian aurkitutako gorputz baten hortzetako DNA aztertuta (zehazki, hortzetako genoma mitokondriala), eta ikusi dute gaur egun Afrika iparraldean ohikoak diren ezaugarri genetikoak dituela. Eta, beraz, Errumaniako gizaki hau bertakoen arbasoa dela ondorioztatu dute.

Euskaraz bizitzeko hautua egin duten herritarrek izaten dituzten oztopoak eta lorpenak ekarri dizkigu Hizkuntza Eskubideen Behatokiko Garbiñe Petriatik.

Maiatzaren 14an, 'Udaberri jaia' ospatu zuten Gasteizko Oihaneder Euskararen Etxean bigarren urtez antolatutako Hizkuntza Gutxituen Musika jaialdian, eta 'Hitz adina mintzo' izeneko hizkuntza gutxituen aurtengo zikloari amaiera eman zioten horrela.

Radiokulturako lagunek Marmau elkarteko Ximun Beracavelleri egindako elkarrizketa ekarri dugu gaurko irratien tartera. Ondoren, Estitxu Eizagirrek Argiaren aste honetako alea aurreratu digu, bereziki, balizko independentziari buruz Xabier Barandiaran eta Jule Goikoetxeari egin dieten elkarrizketa. Halabediko Igor Goikoleak Joseba Fernandez de Landarekin hitz egin du gazteen politika mailako parte hartzeaz.