Esperientziadunak eta musikaren munduan berriak direnak batu dira HAN taldean. Elorriokoak dira eta taldearen izen bera daraman euren lehen diskoa kaleratu dute. Lehen aurkezpen bira amaitu berritan hitz egin dugu Gorka Molerorekin ( Non Demontre, Mokaua, Ama Say, Yakuzi). Gustura agertu da taldean konbibentzia polita lortu dutela eta diskoak espero baino harrera hobea izan duela adieraziz.

[TERTULIA] Durangoko azoka kulturaren plaza izateaz gainera, euskal kulturaren parte ere badiren herri eragileen eta eraldaketa sozialaren alde lanean ari diren ekimenen plaza ere bada. Zer garrantzia du azokak eragile hauentzat? Zer garrantzia ematen die azokak herri mugimendu hauei? Kultur aldaketa eta aldaketa soziala txanpon beraren bi aurpegiak dira? Oihana Etxebarrieta eta Axier Lopezekin egin dugu gogoeta.

Astorroxa umore tartean Pekinetik Errusiara iritsi berritan topatu dugu Giussepe Olaizzola gure opera kritikoa. Pekineko airea arnastuz tojo-tojo omen dabil bere autokarabana. Bi opera proposatu dizkigu gaurkoan: Straussen Elektra eta Hansel und Gretel. Venezuelarako bidea hartu asmoz omen dabil, hurrengo urtean kontatuko digu.

"Desazokatzen" topatu ditugu Gerediaga elkarteko presidente Nerea Mujika eta Ahotseneako arduradun Lutxo Egia Durangoko Azokaren 50. edizioa amaitu berritan. Dagoeneko burua hurrengo edizioan jarria dutela aitortu digute baina errelebo eta gazteengan begirada jarrita topatu ditugu. Hainbat gunez osatutako azoka formatoa bere heldutasunera iritsi dela aipatu digu Mujikak, harro agertu da, eta aurrera begira gazteak antolakuntza lanetan sartzea ezibestekotzat jo dute biek.

Hainbat disko berritasun eskainiko ditu aurten ere Baga Biga disketxeak Durangoko azokan. Besteak beste, Txapelpunk, Enkore, E.T.S, Korrontzi eta Larregain taldeen disko berriak. Horiek aurkeztu dizkigu Ritxi Aizpuruk. 

Bidehutseko taldeek gau berezia dute gaur Durangon, kontzertua antolatu dute Plateruenean. Joseba Irazoki hurbildu da gurera etxetik ekarri diogun gitarra eskuan eta aurrerapena egin digu. Durangoko azokaz eta autoekoizpenean oinarritzen diren lanez hitz egin dugu berarekin.

Susa argitaletxeko editore Gorka Arreserekin ere izan gara, eta berak ere egin dizkigu pare bat proposamen: Harkaitz Canoren "Beti oporretan"  eta Gotzon Barandiaranen "Gidariaren okerrak" lanak. Oso liburu ezberdinak, lehendabizikoa ipuin txikiez osatutako lana, bigarrena eleberria. Liburu salmentetan Durangoko azokak duen eraginaren inguruan ere galdegin diogu, eta erantzun digu, soilik urteko salmenen %8-11 lortzen dela soilik, eta horregatik  urte osoan zehar egin behar dela esfortzua.

ENTZUNeko Xabier Sagardia hurbildu da gurera, baina ez da bakarrik etorri, esku artean ekarri du Entzun aldizkariko ale berria. Gustu ezberdinak biltzen dituen musika proposamenak, erreportajeak eta elkarrizketak. Oraingoan ere CDa badakar liburuak, guztira 18 kantu. Diska osatzerakoan, esan digu oreka bat bilatzen saiatzen direla beti, diskoetxe ofizial eta autoekoizpenak aipatuz. Euskal Herriok produkzioa handia dela esan digu, urtean 300 diska baino gehiago kaleratzen badira, ezin denak sartu, noski Entzuneko CDan.