Joseba Baleztena batu zaigu musika proposamenen atalera. Lehen kolaborazio honetan Marc Ribot New Jerseyko gitarrista ekarri digu. Tom Waits, Elvis Costello edota John Zorn bezalako musikariekin kolaboratutakoa. Bere estilo aniztasuna eta musikari mugarik ez jartzea nabarmendu dizkigu Baleztenak.

Bueltan dira Gorka Urbizu, Imanol Ubeda, Haritz Beristain "Txiki" eta Mariano Goñi. Hamar urteren ondoren laguntasunak eta musikari bezala aberasteko nahiak elkartu ditu Berri Txarrak, Bide Ertzean, Kashbad eta Balerdi Balerdi taldeetako kideak. Zazpi kontzertu eskainiko dituzte eta ondoren printzipioz berriz desegingo da Peiremans taldea. Lehen hitzordua ostegun honetan dute Bilboko Kafe antzokian.

Indar hunkigarria du Rafeef Ziadah-k, Danele Sarriugartek gaur ekarri digun poeta palestinarrak. Beiruten jaio eta errefuxatu palestinarren alaba eta biloba, bere poesia Palestinaren askapen borrokarekin ezinbestean lotua dago. 2011ko zuzeneko emanaldi bati esker zabaldu zen bere lana. Orain, disko berria argitaratzeko lanetan dabil eta auzo-laguntza kanpaina jarri du abian.

[TERTULIA] Pasa den ostiralean aurkeztu zuten Donostia 2016 Hiriburutzako programazioa. Urtarrilean hasita 102 proiektu, 500 ekimen. Gora behera guztien ondoren iritsi da hiriburutza, eta ba ote dakigu zer den Donostia 2016? Elkarbizitza sustatzea du helburu, hala erakutsi du orain arteko prozesuak? Zer garrantzia du hiriburutzak? Anartz Bilbao eta Amaia Ereñaga gurean.

Asier Beramendiren proiektua da Eraul taldea. Bakarlari gisa hasi, Suedian musikarako ateak zabaldu, zenbait kantu grabatu eta Kutxa Kultur Festibalean hautatu ostean bide berriak ireki zaizkio taldeari. Gurean izan ditugu Asier Beramendi bera, Borja Anton eta Maria Bustosekin batera. Gitarra, biolina eta txeloa hartuta etorri zaizkigu Eraulen kantu melankolikoekin estudioa betez.

Amatasunak bizitza aldatzen dio bati baina bereziki alde praktikotik aldatzen zaio ama bati bere bizitza. Esperientzia pertsonala oinarri hartuta zenbait aholku praktiko eman dizkigu Idoia Torregaraik Barretartia azpi atalean. Pardelak, karritoa, norberaren dutxa, marrazki bizidunak...guztia umorez eta umoretik!

Omar Souleyman eta bere musika ekarri dizkigu Leire Lopezek musika proposamenen tartean. Zaila izaten da inguru haietako musikaren berri izatea baina oraingoan zuzenean entzuteko aukera izango da gurean, azaroaren 7an Donostian joko baitu. Siriako gerra aurretik eskontzetan jotzen zuen Souleymanek eta bertako grabazioekin 500 disko baino gehiago ditu. Egun, Turkian bizi da exiliatuta.

Mazak hartu eta sagarra joz sagardoa garai batean egiten zen modura egingo dute bihar beste behin Arizkunen XVI Kirikoketa Bestan. Langintzari ezarritako izena Kirikoketa istrumentutik dator. Hala, lana eta musika uztartzen dituen besta izango dela biharkoa adierazi digu Xabier Torres Jo ala Jo kultur elkarteko kideak.