Hamalau urteren ostean kaleratu du bere bigarren diskoa Iratxe Mugirek. La piel transparente du izena eta mimo askorekin egin duela ziurtatu digu. Euskara, gaztelera eta galegoa uztarten ditu "guztiak nireak sentitzen ditut" esanez. Zuzenekoak eskaintzen ari da orain eta igandean Donostiako Dokan aurkeztuko du.

Astorroxa gure umore tartera beste behin ere bisita egin digu Dolores Mujika "Doloxek". Zoriondu gaitu, Idoia Torregarairi muxu handi bat bidali dio eta segidan bere haserre eta aldarrikapenak agertu dizkigu: turismoak Donostian izan duen gorakadarekin sututa dago eta Gazte Akelarretik bueltan pixaren iraultza aldarrikatu du. Bilgune Feministarentzat ere badu proposamena: hiztegi bat.

Ostiralean hasiko da Arrigorriagan XXII. Nazioarteko Clown eta Pailazoen Jaialdia. Igandea bitarte 11 ikuskizun eta bestez gozatzeko aukera izango da, guztiak dohainik gainera. Herriko hiru gune bihurtuko dira eskenatoki: udaletxe plaza, frontoia eta kiroldegia. Amagoia Garaizabal Armesto jaialdiko zuzendari eta udaleko kultur teknikariak eman dizkigu xehetasunak.

Euskal zinea existitzen ez zela esaten zen garaietan bera jada ari zen egiten. 1985ean Kalabaza tripontzia marrazki bizidunetako lehen euskal film luzea egin zuen eta ondotik etorri ziren beste hainbat. 66 urte zituela zendu zen pasa den ostiralean Juanba Berasategi. Haren ibilbideari eta pertsonari begira jarri gara Euskadiko Filmategiko Jon Lopezekin eta Joserra Senperena musikariarekin.

Euskal Kantugintza atalean emakume musikariek duten ikusgarritasunaz edo ikusezintasunaz aritu gara Leire Palaciosekin. Musikariek eurek jasan behar izaten dituzten komentarioak, gutxiespenak edo biolentzia anitzak aipatu ditugu. Baita hainbat musika jaialdik (Azkena Rock edo Ze Premikin!) agertu duten emakume presentzia eza ere. Oholtzaz kanpoko ikusezintasunak ere nabarmendu dizkigu Palaciosek.

Gernikako bonbardaketak utzitako arrastoei buruzko gogoeta baten soinu banda egin du Aitor Etxebarriak Markak diskoan. Hamar urtez "El Txef A" bezala musika elektronikoan aritu ostean zinemarako bere lehen lana egin du, Hannot Mintegia lagunak proposatuta. Azken honek egindako Gernika dokumentalerako soinu banda da Markak. Etxebarria berak aurkeztu digu.

Udaberriarekin batera iritsi dira Susa argitaletxeak kaleratzen dituen Munduko Poesia Kaiera berriak. Maialen Berasategik ekarri du euskarara Adrienne Rich, Uxue Alberdik Alfonsina Storni eta Iker Alvarezek Dylan Thomas. Ohi bezala, kaieren zuzendari Beñat Sarasolak aurkeztu digu bakoitza eta Maite Bidarte Sotak irakurri dizkigu ahozgora bakoitzaren poema bana.

Juanba Berasategi zinegile gipuzkoarra hil da, gaixotasun baten ondorioz. Marrazki bizidunen alorrean aitzindaria izan zen Euskal Herrian. Berea zen, halaber, Euskal Herrian marrazki bizidunetako lehen pelikula luzea, ‘Kalabaza tripontzia’.