Euskal balea-arrantzaleek egun AEBtako Maineko kostaidean edukitako presentziaren atzetik dabil Elkarrekin-Together dokumentala. Gosnold esploratzaile ingelesak idatzi zuen 1602ko espedizioan euskal arrantzaleak han egon zirela esan ziela natiboek. Terranovako euskal arrantzaleen gune ospetsuaz, Placentiaz ari zela uste izan da, baina bestelako susmoak zituen Xabier Agote Albaolako lagunak. Hori horrela AEBtako profesional ezberdinekin egindako lana azaltzen du. Igor Otxoak esan digunez filmaz haratago "elkarbizitzaren ideia"nabarmentzen da.

Euskal dantzak sinbolo eta metafora hartuta, sormenezko film libre bat osatu nahi izan du Esnalek, bizitzaren zikloaren istorioa eta gizakiaren garapena erakutsiz. Proiektu hau Glocal in progress izeneko atalean dago Zinemaldian. Oraindik postprodukzio fasean dauden filmak dira, eta ekoizle, banatzaile, eta profesional ezberdinen aurrean aurkeztuko dute. Datorren urterako nahiko luke amaituta izan, baina hori "denborak" esango du.

Ximun Fuchs eta Eñaut Castagnet lehengusuek egin dute Non filma. Frantzia erdialdeko herri txiki batean lantoki batek hondoa jo eta hortik sortutako kexadura bat du oinarri. Noski honek bizitzaren eta borrokaren alde ezberdinak azaleratuko ditu. Fuchsek aitortu digunez, "dena osoki" egin dute eurek, "aurrekontu ttipikoa" izanik. Inplikatu diren ehunka lagunekin izandako harremana jartzen du balorean.

Mirokutana ekoiztetxeko Ander Iriarte zine zuzendariak Donostiako Zinemaldiko Lau Haizetara sekzioan defendatuko du torturaren inguruan Pako Etxeberria mediku forentsearekin egingo duen dokumentala. Dokumental honen azalpenak eta aurki grabatuko duten Bihar dok hamahiru proiektuaren gainean hitz egin digu. Honek Ez dok hamairu eta euskal sukaldaritza berria ditu ardatz.

Aitor Arregi, Handia filmeko zuzendarietako bat saio berezian izan dugu. Pozik daude emaitzarekin, baina aitortu du ezinezkoa dela guztiei gustatzea, hori seinale ona ere ez litzatekeelako. Lantaldeak "duen guztia eman du" Arregiren esanetan. Bi anaien "erlazio sinesgarria" egitea izan da erronkarik handiena zuzendariarentzat. Erpin ezberdinetako istoria kontatzea izan dute xede, biak oso ezberdinak, bata kontserbadorea eta bestea mundua ezagutzeko desiotan. Loreaken aurrekontua hirukoizten du, baina hori ere "erlatiboa" da. "Hau bertze herrialde baten aurrekontu hirkoitza litzateke" gehitu du.

El argentino Ricardo Darín, primer sudamericano en lograr un premio Donostia, el máximo reconocimiento de Zinemaldia, considera el galardón «un gran honor, inesperado por otra parte –ha dicho–, porque uno nunca espera que te venga de los más cercanos».

Constantin Popescun drama latza eraman du Sail Ofizialera, haur baten desagerpenaren ondoren gurasoek pairatzen duten sufrimenduaren isla krudela.

Volar dokumentalean bederatzi emakumeren bederatzi ikusputu ezberdin ageri dira. Guztiek pairatu, sentitu eta jasan dute indarkeria matxista. Mezua garbia azaleratu du Bertha Gaztelumendi zuzendariak: hortik atera direla. Begirada anitza du, badira banakako testigantzak edota taldean solasean aritzean ateratakoak. Emakume hauek "erresistentzia eredu" gisa definitu ditu. "Erreparazio eta aitortza" eskaini nahi izan dute Emakundek sustatutako proiektuan.