“FILM sendoa da Amama” hala esan du Gaizka Izagirrek Asier Altunaren filmaren inguruan. Asko gustatu zaio, eta ziur da zer esan handia emango duela Sail Ofizialean lehiatuko den euskal film honek. Hitz gutxiko filma, baina irudiak garrantzi handia duena.

Baserri giroa, natura, zuhaitzak...altxor asko ditu AMAMA filmak. Entzun hemen, Gaizka Izagirreren kritika. 

Danele Sarriugarte idazle eta itzultzaileak literatur proposamenak egingo dizkigu tarteka. New Yorketik bueltan, hiriaren puska batekin ez ezik Claudia Rankine poetarekin ere egin du topo. Haren Citizen liburua besapean duela etorri zaigu arrazakeriaren eta zapalkuntza hainbaten inguruko biolentzia sinbolikoak pentsamenduan dituela. Sarriugarte berak euskarara itzulitako zenbait pasarte ere entzun ditugu.

Gaur hasiko den Donostiako Zinemaldiari begira jarri gara Gaizka Izagirre zinema aditu eta adiktuarekin. Bere begien bitartez gerturatuko gara egunero pantaila handira eta zazpigarren arteak eskainiko dizkigun istorietara. Aurtengo eskaintzaren laburpena egin digu, arreta berezia jarriz zenbait pelikuletan.

Aurten ere Info7 irratiari esker Donostiako Nazioarteko Zinemaldira joateko aukera izango duzu! Asteartea honetan, arratsaldeko 19:30tan, Donostiako belodromoan Luis Tosar aktore galiziarra protagonista nagusi duen "El desconocido" filma ikusteko sarrerak ditugu! Hartu parte zozketan! 

Intxaurrondon 25. Gastronomia astean daude murgilduta. Sukaldari gazteak eta goi mailakoak Etiopiako Wukron herrian garatzen ari diren Zaporeak proiektuarekin bat egin dute. Oraitz Garciak esan digunez, "bertako elikagaiak lantzeko ahalmena ematea da proiektu honen oinarria"

Euskal kantugintzari begira jarriko gara atal honetan. Atzera begira jarri eta gure kantugintza ezagutu nahi dugu. Horretarako, hainbat lagun gonbidatuko ditugu asteazkenetan. Gaur, Andoni Tolosa etorri zaigu euskal musikaren topikoetako bat besapean hartuta: euskal musika originala da. Ideia hori desmuntatzen duten hainbat adibide ere jarri dizkigu entzuteko.

Tabakalera Donostiako Kultura Garaikidearen Nazioarteko zentroa ireki berritan Ane Rodriguez bertako kultura zuzendariarekin hitz egin dugu. Proiektuaren funtzioaz, ezaugarriez eta kultura ereduez hitz egin dugu berarekin. Kortxoeneaz edota irekiera ekitaldian izandako protestaz ere galdetu diogu.

Astorroxa, hala deitu diogu sintonia honen erritmoan asteartero izango dugun umore tarteari. Ilun esnatu zaigun eguna alaitu digu gaurkoan Giussepe Olaizzola opera kritikoak. Frantziatik aritu zaigu gaurkoan, bere karabanatik, operaz, kulturaz eta beste zenbait kontuz.