Sukalde tartean postre proposamena egin digu gaur Imanol Zubelzu Basque Cullinary Centerreko irakasleak, gure herriko postre ohiko bat: pantxineta. Errezeta gozoaren xehetasunak eman ostean gogoeta egin dugu azukrearen bueltan.

Hogei urte bete ditu Aukeran dantza konpainiak Edu Murumendiaraz dantzaria buru duela. Euskal dantza tradizionalak garaikidearekin uztartzen aitzindariak izan dira eta baita erreferente bihurtu ere. Oso bizirik jarraitzen du konpainiak eta Maurizia ikuskizuna dute azken harribitxia, gaur Donostiako Victoria Eugenian eskainiko dutena. Edu Murumendiarazekin egin dugu 20 urteko ibilbidearen errepasoa.

35 urtetik gora bikoterik gabeko emakume askori egiten zaizkien hainbat aipamen egin dizkigu gaur Onintza Enbeitak Astorroxa umore tartean. Berari egindako aipamenak dira eta guztiek sutu dute. "Etorriko zaizu", "zorte txarra izan duzu baina lasai" edo "badaukat lagun bat zuretzat" bezalakoak. Hori bai, maitemintzeko ez du inolako arazorik, urtean lau aldiz maitemintzen da, joan den astean azkena.

Jarrera matxista hainbat salatu ditu Belako musika taldeak publikoki, eta bereziki kazetaritza alternatiboaren izenean idatzi eta esaten direnengan jarri nahi izan dute fokoa. Jenesaispop hedabidean egindako salaketa facebook-eko euren horman jarri eta gaur Lore Billelabeitiarekin hitz egin dugu. Amorrua eta tristura sentitzen dituztela aipatu digu.

Euskal musikaren iruditegian geratu den bikotea da Alaitz eta Maider, zalantzarik gabe. 2004an amaiera jarri ziotenetik musikatik aldenduta egon da Maider Zabalegi, duela hiru urte inguru ordea, aitonaren heriotzarekin batera ekin zion konposatzeari eta bere bakarkako lehen diskoa kaleratu du orain, "Zuei" izenekoa.

Euskal kantugintza atalean gaur Pott Bandari begira jarri gara Gotzon Barandiararenekin, talde hau sortu zela 40 urte diren honetan. Bereziki Bernardo Atxaga eta Ruper Ordorikaren uztarketaz aritu gara, aipatu ditugu Joseba Sarrionaindia eta Joxemari Iturralde "Jimu" ere.

Martxan da Loraldia. Apirilaren 8ra arte euskal kultura garaikidearen epizentro izango da Bizkaiko hiriburua. Orotara, 30 emanaldi eta 150 artista bilduko ditu aurten Loraldiak.

Minutuak segundu bihurtu zaizkigu Unidad Alavesako kideekin. Elarrizketa honetan transmititu duten  giro ona oholtza gainean ere baldin badute, laster zintzilikatu da "sarrera guztiak salduta" kartela haien kontzentuetan. Talde Ataundarra urria bukaeran estreinatu zein Beasainen, eta diska kaleratu dute berriki "Unidad Alavesa" country-folk-rock 9 kantuz osatuta.