Zuloak eta The Dispositives taldeko abeslari ohiak bere bakarkako lana kaleratu du, “Taniatank”. Bere kantu eta estilo propioa lantzeko nahiak eraman du lan honetara eta lagun izan ditu inguruko hainbat lagun musikari baita Fermin Muguruza ere ekoizpen lanetan. Crowdfunding kanpaina jarri du martxan proiektua finantzatzeko. Asteburu honetan bertan Txantrean eta Irunen eskainiko ditu kontzertuak.

Kantuan aritu gara Kalegorrianen, Andoni Tolosa “Morau” eta Beñado Goietxe izan ditugu gurean. Ez dira esku hutsik etorri: “Arrainentzako Hinmoak” beraien azken lana aurkeztu digute. Inspirazio bide zein duten, diskoa nola ekoiztu duten, nola banatuko duten…kantu kontari aritu gara gustora.

Bide Ertzean taldeak bere bederatzigarren diskoa kaleratu du Gaztelupeko Hotsak-ekin “77” izena du diskoak eta bertan, urte hartan, 1977an alegia, errepide kontrol batean hil zuten Sebastian Goikoetxea dute gogoan. Ezkio Itsason jazo zen gertakari hura, Goikoetxearen batera Nikolas Mendizabal “Zaharra” ere hil zuen poliziak. Sebas, Imanol eta Joni Ubeda anai bikien osaba zen, eurek, Bide Ertzean taldeko kide hauek, 4 urte baino ez zituzten orduan.

Bost urte eskasean musikaren lehen lerrora heldu da Las Tea Party Djs-en musika elektronikoa, Eva Gutierrezek eta Lorea Argaratek osatzen duten bikotea. Euskal Herrian iraultza txiki bat egin dute musika elektronikoa giro herrikoietan gogor sartuta. Argaraterekin hitz egin dugu guk.

Anai arreba oiartzuarrek zuzenean jo dute sortzaileen txokoan. 22 eta 26 urte dituzte, eta txikitatik dute abestea pasio, eta nabari da. Gorka gitarrarekin eskuan, a capela ere abestu digute. Gazteak dira, baina ibilbidea iadanik badute, txikitatik kantuarekin hazi baitira. Oholtzako eta oholtzatik kanpoko kontuak aitortu dituzte. Entzun eta gozatu!

Ostiraletan sortzaile, musikari eta abeslariak gonbidatzen ditugu gurera euren ibilbidearen berri eman eta zuzenean kanta diezaguten. Gaur martxoak 8 Emakumeen egunari begira jarri gara kantu feministak egiten dituzten Idoia Arraiza eta Janire Uriarterekin. 2010ean Hernanin izan ziren neska gazteen topaketetarako egin zuten “Kuleroak burura eta salto egin mundura” kantua eta 2012an Leitzan izan ziren topaketa feministetarako egin zuten “Hamaika egiten ari gara” kantuak jo dizkigute zuzenean.

Ostiraletan sortzaile, musikari eta abeslariak gonbidatzen ditugu “sortzaileen txokora” euren lanaren berri eman eta zuzenean kanta diezaguten. Gaur, Iker Lauroba gonbidatu dugu berarekin batera Saharara bidaiatzeko. Saharari Kantari lehiaketa irabazi zuen pasa den urtean horretarako prestatutako “Sahara” kantuarekin. Ondotik, Saharako errefuxatu kanpalekuak ezagutzeko aukera ere izan du eta Hassana Aali gazte sahararrrari bere elkartasuna adierazi dio. Kantu hau eta bere proiektu berriko “Abisatuta negoen” jo dizkigu zuzenean.

Herritarrei bizkar emanez agintariek hartzen dituzten erabakiei Revolta! aldarrikatuz dator Itziarren Semeak taldearen laugarren diskoa. Kaki Arkarazorekin Andoaingo Garate estudioetan grabatu eta Jonan Ordorikaren masterizazioaren ukitua du lan berriak. Ska eta punk doinuak nagusi diren arren, euskal kantu tradizonalek zein erritmo balkaniar eta tropikalek ere badute lekurik. Urriaren 21ean kaleratuko dute diskoa baina primizian gurean aurkeztu digute Manex eta Ibon Altunak. Mila esker kuadrilla!