Euskararen kale erabileraren datuei erreparatu die Alex Artzelusek ere. Uda partean egin ziren azken neurketaren datuak publiko, eta euskararen erabileraren beherakada izan da nabarmendu den ondorioa. Edonola ere, ez zaio iruditzen jendea behar bezainbeste kezkatuta dagoenik.

Abuztuan Jose Mari Mujikak hedabideetara igorritako gutuna gustura irakurri du Euskaltzaleon Topaguneko Iker Martinez de Lagosek.

Irailean sartuta, udarari keinu egin dio Eneritz Albizuk. Deskonektatzeko gogoz egoten omen da bera, hizkuntza polizia egitearren lanari uzteko asmoz, baina gero kosta egiten omen zaio.

Bai Euskarari Ziurtagiriaren elkarteak sortu zeneko 10. urtemuga ospatuko du aurki. Atzera begiratuta, harro egoteko moduko motiboak badituztela nabarmendu du Rober Gutierrezek.

Euskal senean geure hizkuntzaren jatorriaren eta biziraupenaren misterioa dugula uste du Ainara Mayak.

Aktibazioa ikasturte honetako kontzeptu nagusia izango dela uste du EMUN Kooperatibako Txerra Rodriguezek, euskaldunek aktibazioa, zehazki. Horren harira, Donostiako Bagera euskaltzaleen elkarteak ateratako 'Nola egin dute?' eta 'Ekitea da kontua' liburuei heldu die.

Nork esan zuen ez dagoela umorea euskaraz egiterik? Gasteizko Oihaneder Euskararen Etxean euskaraz algaraka amaitu dutela abuztua kontatu du Ane Pedruzok gurean, eta hasi berri den hilabetean ere badutela irri egiteko asmoa esan du. Horregatik antolatu dute bigarren urtez Irri-Barra gaua. Irailean eskainiko dituzten bi tailer ere aurreratu ditu: Dona Dona Katona familia arteko jolas saioak eta Hala Bedi irratiarekin elkarlanean antolatutako Izan media tailerrak

Igande honetan, uztailaren 2an, amaituko da 'Ikimilikilikliki' bideo-instalazioaren egitaraua Gasteizko Oihaneder euskararen etxean. Bertako Ane Pedruzoren arabera, Joxan Artzeren unibertsoan murgiltzeko aukera paregabea eskaintzen du. Uztail amaierarako, berriz, bueltan izango dute musika eta zinema uztartzen dituen zikloa, 'Kortxeak eta krispetak'.