Inork ez du jartzen Durangoko Azokak eragiten duen fenomenoa euskal gizartean. Eta Durangoko herrian, zein ondorio du azokak? Nola bizi dute azoka bertan denda eta tabernek? Asko aldatu al da giroa azken urteetan? Hobera edo okerrera? Galdera  horiek guztiak egin dizkiegu Gozatu merkatari elkarteko Karmele Elexpe eta Plateruenako Eneko Barberenari. Besteak beste aitortu digute, orain, jendeak erabaki egiten duela Durangora noiz etorri eta noiz parrada egin, dela urte batzuk ez zela horrela.

Ikasleen eguna da gaur Durangoko azokan, lehen eguna horrela izan ohi da urtero. Baina aurten bada nobedade bat eta da, euskara ikasten ari diren helduentzako tailerrak izango direla lehen aldiz. Tailer horietan parte hartuko duten ikasle eta irakasleekin izan gara. Besteak beste bikoizketa tailerra egonen da Irudienan, eta horretaz ari gara tailerra emango duten irakasle eta ikasleekin.

Odolki garaian gaude murgilduta, hala gogoratu digu Lierni Elortzak. Atzo bertan, Ordiziko ferian, Juanita Murrilondo, Juanita Aranburu eta Resu Olaetxea, garai batean etxean odolkiak nola egiten ziren erakusten aritu ziren. Baba txikiak ere aipatu ditugu, galtzen ari baita gazteen artean hura jateko ohitura. Aipatu ditugu ere, mizpirak, eta sagarrak. Garaian gaude eta!

Abenduaren 3an hasiko dira Elorrion Bukantz jaiak. Zer da "buzkantza" galdetuko diozue zuen buruari? Kristina Sierrak, Elorrioko turismo bulegoko langileak argitu dizkigu galdera guztiak. 

Hiesaren eta GIB birusaren kontrako eguna da gaur mundu osoan eta baita Euskal Herrian ere. Hori dela eta, Arrasateko Udaleko Sexologia Zerbitzuak hainbat ekimen antolatu ditu. Besteak beste, gaur arratsaldean (18:30etatik 20:30etara) Gurutze Gorriaren laguntzarekin “Stand informatibo” bat antolatu dute. Bertan, informazio objektiboa eskaintzeaz gain, GIB froga azkarra egiteko aukera egongo da.

18:00etan abiatuko dute gaztetxe eta gune autogestionatuen aldeko protesta, Iruñeko Errekoleten plazatik. Gaztetxea bezalako gune autogestionatuak eraldaketarako beharrezkoak direla azaldu dute prentsara igorritako oharrean.

Araba, Bizkaia eta Gipuzkoako lan hitzarmenei buruzko negoziazioak hasi dituzte Confebaskek eta ELA, LAB, CCOO eta UGT sindikatuek. Espainiako hitzarmenen aurrean, hemengo hitzarmenak blindatzea da helburua. LAB sindikatuko Xabier Ugartemendiak azaldu eurek beti defendatu dutela akordio interprofesional bat, baina haratago joan behar dela ohartarazi du.

Gasteizen Zero Waste Europe jardunaldiak ospatzen ari dira. Dani Zuazagoitia EHUko irakasle eta zero zaborreko kidea ibili da antolaketa lanetan eta gurera gonbidatu dugu gaur.  3 urte geratzen dira Europak ezarritako birtziklatze-helburuak betetzeko, eta Zerozaborreko kideak ez da oso optimista "2020rako %60-65a bildu beharko da selektiboki, Gasteizen oso urrun geratzen zaigu kopuru hori. %25ean gaude eta zifra hori ez da aldatu azken 10 urtetan. Zer aldatu behar da arabako hiriburuan Europako tasak betetzeko?