Baztango alkate ohia mila eurotara zigortu dute Lekarozen egin asmo duten Aroztegia proiektua "pelotazo urbanistikoa" dela esateagatik. Elizegik helegitea iragarri du, "promotoreei nahi dutena egiten ezin zaielako utzi". Galdera ere luzatu du: "45 hektarea 530 mila euroko balioa izatetik, 36 milioi euroko baliora pasatzea proiektua onartu ondoren ez al da pelotazoa?". Auzitegietan kontu bat baino gehiago dago, tartean Udalez Gaindiko Plan Sektorialari jarritako helegitea. Lekaroz eta "Baztan osoa desorekatzen" duen proiektua dela uste du, eta horren kontra jarraituko dute "determinazioz".