Etorkizunari baikor begiratzeko motiboez eta proposamenez hitz egin nahi izan du AEK-ko Mertxe Mugikak gaurkoan. Euskararen biziberritzean ziklo berri bat abian dela uste du, horren erakusle direla martxan dauden askotariko eztabaida gune eta foroak. Oraindik egiteko asko dagoen arren, sektoreen arteko adostasunaren beharra partekatua dela iruditzen zaio, eta AEK-k elkarlan horretan parte hartuko duela ziurtatu du. Uda garaian, gainera, euskara ikasteko eta hobetzeko aukera eskaintzen duela AEK-k ekarri du gogora, baita era askotako ikastaro aukeren xehetasunak aipatu ere.