Ondoren, Estitxu Eizagirrek Argiaren aste honetako alea aurreratu digu, bereziki, M15 mugimenduak bost urte beteko dituela baliatuta, Gorka Bereziartuak egindako erreportajea, mugimendu horrek euskal egoera politikoan izan duen eraginaz. Radiokulturako lagunek Europako beste bost irratirekin elkarlanean garatu duten giden biltoki digitalaz Mikel Etxebarriak Info7 irratian horretaz esandakoak jaso ditugu eguneko adierazpenen tartean. Halabedi irratiko Igor Goikoleak Askapenako Julen Zulaikarekin hitz egin du, Kanpezun egingo duten Palestinaren aldeko egunaz eta Kanpezuko Udalak Israeli boikota egiteko onartuko duen mozioaz. Komunikazioari zabaltzen diogun Xabier Landabidea batu zaigu eta uztailean UEUko ikastaroen baitan eskainiko duten 'IKTak Euskal Herrian: ikerketa, ezagutza eta ekintzarako abiapuntu berriak' ikastaroaz hitz egin digu. Amaitzeko, Osintxun iraileko festetarako musika eskaintza zehazteko antolatu duten 'Osintxun musikara!' lehiaketaren berri ekarri digu Jon Olivaresek.