Lewis Grassic Gibbon-ek 1932an idatzitako nobela klasikoan oinarrituta, filmak XX. mende hasierako Eskoziako landa-guneko komunitate batera eramaten gaitu. Neska gazte bat, Chris, helduaroan sartzen ari da Ewan aztoragarriaren ondoan maitasuna bilatu nahian, bere familiak tragediari aurre egin behar dion bitartean. Gizarte-asaldura eta ezinegon garaia da, eta halako batean, Lehen Mundu Gerra iritsiko da.

Terence Daviesen (Liverpool, 1945) filmografiak izenburu gailen asko biltzen ditu: Distant Voices, Still Lives (1988), Urrezko Leopardoa Locarnon, The Long Day Closes (1992), Cannesen lehiatu zena, The House of Mirth (2000), Of Time and the City (2008) edo The Deep Blue Sea (2011), Donostia Zinemaldiko sail ofizialean lehiatu zena. 2008an, Donostia Zinemaldiko 56. edizioan atzera begirako bat egin zen haren omenez.