Itzulera da Martin Bidaurren (Okzitaniako Tolosa, 1996) lehen poema liburua, joan den urteko proposamen poetiko interesgarrienetakoa. Ni poetikoaren eta bere bizipenen marka gisa agertzen zaizkigu poemak: ni poetiko eszeptiko bat, bakartia askotan, deslotua. Hara eta hona dabil poeta, espazio eta egoera askotarikoetan, baina bere begiratuak ildo beretik jotzen du beti: eszeptikotasunetik, eta baita, tarteka, iluntasun oso latzetik ere. Liburuaren hasierako Mari Luz Estebanen aipuak esaten duen bezala, pozik dagoenean ere, nostalgia du poetak babesleku. Baina ez hori bakarrik: baita poesia bera ere.