Ur botilen plastikoaren eta egunero asko erabiltzen ditugun beste hainbat materialen oinarria den PET (polietilen tereftalatoa) jaten duen mikroorganismoa aurkitu dute. Azkar esanda, orain arte ustez biodegradagarria ez zen material bat orain biodegradagarria izan daitekeela dakigu.

Hezurren Osineko fosilen DNA nuklearra aztertuta, ondorioztatu dute duela 430.000 urteko gizaki haiek ahaidetasun handiagoa zutela neandertalekin, denisovarrekin baino. Aurrez, DNA mitokondrialaren analisi batek kontrakoa iradoki zuen. Ezusteko emaitza izan zen, hezurren morfologia neandertalenaren oso antzekoa baitzen. Orain, DNA nuklearraren analisiak neandertalen lerrokoak zirela berretsi dute.

Tim Bliss, Graham Collingridge eta Richard Morrisek jasoko dute aurtengo Brain Prize saria, memoriaren mekanismoak ikertzeagatik. Milioi bat euroko saria dela jakinda, erraz uler dezakegu 2011tik Danimarkako Grete Lundbeck Fundazioak (Europako Garunaren Ikerketaren Munduko  fundazioak) urtero banatzen duen Brain Prize honen garrantzia. Oinarrian, esan daiteke neuronen arteko konexio indartuetan gordetzen dela memoria. Baina zer gertatzen da gure garunean guk gauzak gogoratzeko?

Giza hezurrak, kartilagoak eta giharrak sortzeko gai den 3D inprimagailu bati esker, giza belarri bat eta matrailezur bat sortu dituzte. Oraindik transplantatzeko modukoak ez diren arren, orain arte giza organoen inpresioarekin zeuden zailtasunak gainditu dituzte AEBetako Wake Forest Unibertsitateko bio-ingeniariek.

Jakina da gaur egungo europarrok eta asiarrok Neandertalengandik heredatutako geneak ditugula gure DNAn. Zehazki, genomaren %1.5-4 en artean da jatorriz Neandertalena. Orain, herentzia genetiko horrek europarron osasunean duen eragina aztertu dute, eta ondorioztatu dute erlazioa dutela zenbait gaixotasun neurologiko, psikiatriko, immunologiko, dermatologiko eta zirkulatorioekin.

Duela 100 urte Einsteinek iragarritako uhin grabitazionalak existitzen direla baieztatu du LIGO erakundeak. Einsteinen esanetan masa duen edozer gauzak, mugitzean, inguruko espazio-denbora deformatu egiten du, uhinak sortuta. Mende bat pasa behar izan da uhin horiek detektatu ahal izateko, baina aurkikuntza honen garrantzia kontuan hartuta, Nobel saria irabaziko duela diote, espazioa ikertzeko aurrerapauso handia da-eta.

Estatu Batuetako NIH (National Institutes of Health) erakundeko ikertzaileen arabera, toxikotasun azterketetarako ez da beharrezkoa animaliarik erabiltzea, aski da zelulak erabiltzea.

Plutonek Eguzki Sistemako 9. planeta izateari utzi ziola 10 urte bete direnean, benetako 9. planeta bat egon daitekeela iragarri dute. Izan ere, Mike Brown-en taldeak Eris astroa aurkitu zuen 2005ean, Neptuno baino urrutiago, eta ikusi zuten Eris Pluton baino handiagoa zela. Orduan piztutako eztabaidaren harira heldu da iragarpen berri hau.