Gogoeta horren bueltan aritu gara bertsolaritzari eskaintzen diogun tartean Ane Labakarekin. Bertso musikatuak, bertso jazza, bertso pilota, bertso kabareta, bertso zunba...ekimen mordo bat sortu dira azken urteetan. Guztiak dira zilegi, interesgarri eta beharrezko? Nola egokitu bertsolaritza garai berrietara?

Urtea amaitzear den honetan Donostia 2016 Kultur Hiriburutzaren balantzea egin dugu Xabier Paya kultur programaren arduradunarekin. Betetako programazioari begira jarri gara, baita elkarbizitza oinarri izan duten ekimenei edota Hizkuntza Eskubideen Protokoloari begira ere. Haserre agertu da Euskal Irrati Publikoak atzoko agerraldiaz esan dituenekin.

Bigarren lana kaleratu berri du Makulu Ken taldeak, "kalé kalé" du izena eta euskalafrobeata egiten dute, kantuetako batean dioten bezala. Kalea, mestizaia, errefuxiatuak, bizitzaren aldeko aldarria...bezalako gaiak landu dituzte doinu dantzagarri zein lasaietan. Autoekoizpena izaki lan eskerga egin dute baina gustura daude.

Tertulian Ixabel Etxeberria eta Jon Garmendia izan ditugu gaurkoan. Korrikaren kantu berriari, 20. edizioari eta bere mezuari begira jarri gara. Ramon Saizarbitoriak urrezko domina jaso berritan egin dituen adierazpenei ere erreparatu diegu.

Ia hogei urte daramatza idazten Toti Martinez de Lezeak, urte hauetan guztietan 52 liburu kaleratu ditu, horietatik 22 eleberri historikoak dira. Kaleratu duen azkena "Tierra de leche y miel" edo "Esne eta eztizko lurra" da, gazteleraz eta euskaraz argitaratuak. Azken lanaz eta bere ibilbideaz hitz egin dugu berarekin.

Duela 20 urte sortu zen Entzun musikari buruzko euskarazko aldizkari espezializatua. Eta urteurrena ospatzeko bi produktu kaleratu dituzte: Entzun!66 disko-liburua eta Aho Bete Doinu 2 elkarrizketa liburua. Proiektua aurrera begira aberasteko gogoeta aldia ere zabaldu dute. Iñigo Martinezek eman dizkigu xehetasunak.

Entzuleen tartea da “Hartu Hitza”; zuen iritziak, deialdiak edota kanta proposamenak egiteko irrati-tartea. Eta baita diska berriak aurkezteko ere. Aste honetan adibidez, Jimmy Muelles bakarlariak bere azken lana, “Ladridos de pájado” diska aurkeztu digu.

Zer da euskal zinemagintza? Nolakoa izan behar du? Euskaraz egina? Eztabaida hori lehen aldiz mahai gainean jarri zuen Ikuska proiektuak 1979-1984 urteetan. Antxon Ezeizak koordinatutako lanean hamabost zinemagilek parte hartu zuten (Montxo Armendariz, Imanol Uribe edo Mirentxu Loiartek, besteak beste). Orain, lan hura berrargitaratu dute GARAk eta EKHEk. Asteburuan eskuratu ahal izango da Gara egunkariarekin.