Nahi baino gehiago luzatzen ari omen den euskalgintzaren bidegurutzean, politizazioaren inguruko hitzez ahoa betetzen zaigun ustea du Manex Agirrek.

Azken hilabetean, sarritan izan omen du gogoan Nafarroa AEK-ko Mertxe Mugikak. Hezkuntzako Lan Eskaintza Publikoan euskarazko plazek sortu duten eztabaidaz nahiz Iruñeko haur eskoletan euskarazko eskaintza areagotzeak eragin duen kalapitaz oroitu da, eta gogora ekarri du euskaldunon eskubideen aldeko erabakiek euskaldun ez direnen eskubideak urratzen dituztela esaten dutela zenbaitek.

Euskal Herrian euskaraz bizitzeko hautua egin duten guztiek har dezaketen erabaki hipotetikoa planteatu du Aitor Abaroak: harremana euskaraz egiteko aukerarik ematen ez duten denda, taberna edo zerbitzuetan ezer ez kontsumitzea.

UEMA Udalerri Euskaldunen Mankomunitateak eta Nafarroako Gobernuaren Euskararen Nafar Institutuak eginiko lehen bileraz hitz egin du UEMAko lehendakari Josu Labakak, lankidetzan aritzeko aukera dutela sinetsita. Nabarmendu du UEMAren 25. urteurrenean bildu direla bi erakundeak, eta harremanak normalizatzaz gain, lankidetzaren ekarpenez aritu ziren. Administrazioa euskalduntzeko bitartekoak eta politikak eskainiko dizkio UEMAk Nafar Gobernuari, eta arreta berezia eskainiko dio udalerrien euskalduntzeari ere.

Hizkuntza batetik bestera botoi bat sakatze hutsarekin salto egiteko ametsaz hitz egin digu Saroi Jauregi Aiestaranek, Elhuyarreko Hizkuntza eta Teknologia unitateko komunikazio-arduradunak. Zehazki, Android gailu mugikorretarako Mitzuli aplikazioa aurkeztu digu, 50 itzulpen noranzko baino gehiago barne dituena eta baliabide urriko hizkuntzei protagonismo berezia ematen diena, euskarari, besteak beste. Testu, ahots zein kamera bidezko itzulpen sarrera eskaintzen du, eta off line moduan ere baliatu daiteke. Gainera, baliotsua izan arren, doakoa eta software librekoa da.

Distantziaz gertu izan arren, hizkuntza aldetik urrun sentitzen dituen errealitateez hitz egin du Mikel Astarlozak. Konkretuki, Essor Basque txirrindulari lasterketako jarraipenean gertatuak eman diote zer pentsatua. Donapaleun, Maulen eta Kanbon izandako helmugetan bildutako zaleen artean euskararik ia ez baitzuen entzun. Euskal Selekzio gisa parte hartu zuten euskal txirrindulariek bertan, baina aipamen guztietan "L'équipe espagnole" gisa aurkezten omen zituzten. Astarloza etxetik 80 kilometrotara duen Oñatin gertuago sentitzen omen da 40 kilometrotara duen Kanbon baino.

Arazoa dela onartzea omen da irtenbidea aurkitzeko lehen urratsa, eta euskalduntze prozesuaren baitan pauso hori emana dagoela uste du Karmelo Ayestak.

Gazte eta nerabeek euskararekiko duten jarreraz hitz egin digu Iñaki Eizmendik, sentsibilizazioa izatetik eragile aktibo izatera pasatzeko egin beharreko urratsaz.