EH Baiko Anita Lopepek aitortu du abertzaleek historikoki egitura zabalago baten alde aritu direla borrokan. Edonola, positiboa de Euskal Elkargoaren eratzea. Hori bai, argi utzi du gehiago nahi dutela abertzaleek, besteak beste, erabakitzeko ahalmen handiagoa.
LAB sindikatuko Eñaut Aramendirekin ere hitz egin dugu, eta ildo beretik egin du lehen baieztapena, urrats positiboa bai, baina txikia. Langileriari ekarpen positiborik egingo ote dion galdetuta, argi esan du, gaur gaurkoz ezetz, baina aukera hori aldatzeko ere aukerak badaudela.
Batera plataformako eleduna da Jakes Bortairu eta haren ustez, Euskal Elkargoarekin fase berri bat abiatuko da Ipar Euskal Herrian. Baina ez da ahantzi behar, proposamena Parisetik etorri dela, eta Bortairuk gogoratu du Notre legearen ondorioz sortzen dela elkargo hau, eta prozesua estatu mailakoa dela, beraz. Horregatik sortuko den Elkargoak ez duela erantzuten herri mugimendutik egin den historikoki eskariari.
Laborantza Ganbaratik positibo hitz egin du Mixel Berokoirigoinek, eta nabarmendu Euskal Elkargoak onurak ekarriko dizkiola laborantza munduari. Gurean esan du laborantzak tarte berezia izango duela Elkargo berrian.
Hur Gorostiaga, Seaskako zuzendaria, baikor agertu da Euskal Iparraldean eman den aurrera pausoarekin. Argi du garaipen bat izan dela, nahiz eta oraindik lan asko egin behar dela dioen.
Aitzina gazte antolakundeko Aitor Servierren arabera, Ipar Euskal Herria eskuindarra da egun, eta ez da sorpresa izan Jean Renè Etxegarai lehendakari izateko hautagai nagusia izatea. Aitzinaren ardura, kalean presioa egitea izango da aurrerantzean.