Eguraldia
Joxe Landaren iragarpena
Gaurko eguraldia

UDA GIRO PETOA UDAZKENARI KAIXO ESATEKO

Atzoko tonikari eutsiko dio eta, gainera, onaren mailak zertxobait irabaziko du, goizeko akats txiki horiek ere desagertuz. Haizea ia geldi goiz partean hego ukituarekin eta arratsaldean iparrekoarekin. Hodei sare batzuk zeru sabaian baina eguzkia bistan eta tenperatura atzo baino pixka bat gorago egunean zehar. Horrela giroaren goxotasunak zertxobait irabaziko du. Hori bai, aldaketaren zantzuak sumatuko dira iluntzean eta okerrera joko du gauean zehar. Hala ere, txarkeria asko ez du ekarriko aldaketa horrek. Uda giro petoa gaurko honetan Euskal Herri guztian. Modu polita udazkenari kaixo esateko. Ea urtaro atsegina tokatzen zaigun.

Bihar

MENDEBALDEKO ERASO BATEN KASKARKERIAK

Mendebaldeko eraso batek harrapatuko gaitu, giroa pixka bat kaskartuz. Ipar-mendebaldeko haizea pixka bat mugituz, freskura eta laino narrasak ekarriko ditu giroa dezente mikaztuz. Tenperatura dezente beherago eta zerua erabat estalia lainotzarrak arrastaka direla. Euri zipriztin batzuk ere bai agian, batez ere ipar partean. Hegoaldean gutxiago nabarmenduko da aldaketa. Gaurko kontua izango da, bihartik aurrera onaldi polita izango baitugu berriro ere. Ea irauten duen eta udazken giroaren alde ona erakusten digun eguraldiak hurrengo egunetan ere.

Joxe Landa. (Gorka RUBIO / ARGAZKI PRESS)